ისინი მუდმივად შეგვიქმნიან პრობლემებს დასავლური ინტეგრაციის გზაზე, თუ არ გავუშვით შემოდგომაზე, არჩევნების გზით ხელისუფლებიდან, - ამის შესახებ პარტია „ევროპული საქართველოს“ წევრმა აკაკი ბობოხიძემ პარლამენტის უკანა შესასვლელთან მიმდინარე აქციაზე განაცხადა.

მისი შეფასებით, ხალხის მთავარი მიზანი არჩევნების გზით ხელისუფლების შეცვლა უნდა იყოს.

"მიმდინარე პროცესებმა კიდევ ერთხელ დაადასტურა, რასაც "ევროპული საქართველო" კარგა ხანია აცხადებს. "ქართული ოცნებისთვის" ანტიდასავლურ მოქმედებებში და გზაზე არ არსებობს დაბრკოლება. ის თავისი არსით არის ანტიდასავლური პარტია. ისინი მუდმივად შეგვიქმნიან პრობლემებს დასავლური ინტეგრაციის გზაზე, თუ არ გავუშვით შემოდგომაზე, არჩევნების გზით ხელისუფლებიდან. ხალხის მთავარი ამოცანა უნდა იყოს ამ პრობლემის ერთხელ და სამუდამოდ მოგვარება და არადასავლური, პრორუსული ძალების არჩევნების გზით ხელისუფლებიდან ჩამოშორება", - განაცხადა აკაკი ბობოხიძემ.

ცნობისთვის, საქართველოს პარლამენტის უკანა შესასვლელთან სამოქალაქო ორგანიზაციებისა და მედიის წარმომადგენლები აქციას მეორე დღეა მართავენ. აქციაზე მყოფები აპროტესტებენ კანონპროექტს

“უცხოური გავლენის გამჭვირვალობის შესახებ“, რომელსაც იურიდიულმა კომიტეტმა გუშინ პირველი მოსმენით მხარი დაუჭირა.