ყოველთვის გამოჩნდებიან ადამიანები, რომლებიც მაქსიმალურად ცდილობენ, რომ პროვოკაციული სიტუაციები შექმნან - ვინც ინიციატორები არიან, რომ ახალგაზრდები შეცდომაში შეიყვანონ, გაიპარებიან და გაიძურწებიან ხოლმე აქციიდან, ვერავინ ხედავს მათ, - ამის შესახებ „ქართული ოცნების“ გენერალურმა მდივანმა, კახა კალაძემ გიორგი ქადაგიძის მოწოდებაზე კომენტირებისას განაცხადა, რომელმაც აქციაზე სიტყვით გამოსვლისას შეკრებილებს პარლამენტისთვის წრის დარტყმისკენ მოუწოდა.

როგორც კალაძემ აღნიშნა, არავინ უნდა გადადგას ისეთი ნაბიჯი, რომელიც კანონს მიღმა იქნება, სხვა შემთხვევაში სახელმწიფოს კანონის ფარგლებში მოუწევს რეაგირება.

„სამწუხაროდ, ყოველთვის გამოჩნდებიან ხოლმე ადამიანები, რომლებიც მაქსიმალურად ცდილობენ, რომ შექმნან პროვოკაციული სიტუაციები. ჩვენ, არაერთი ფაქტის მომსწრენი ვართ, როდესაც ხდებოდა ამ ტიპის განცხადებები, შემდეგ ისინი, ვინც ინიციატორები არიან, რომ ახალგაზრდები შეცდომაში შეიყვანონ, გაიპარებიან და გაიძურწებიან ხოლმე აქციიდან, ვერავინ ხედავს მათ.

მინდა ყველას მოვუწოდო, რომ ამ ქვეყანაში გამოხატვის და სიტყვის თავისუფლება დაცულია, ეს შეიძლება სხვადასხვა ფორმით იყოს, მათ შორის, აქციით. ეს უნდა გავაკეთოთ კანონის ფარგლებში, მშვიდობიანად, არავინ უნდა გადადგას ისეთი ნაბიჯი, რომელიც კანონს მიღმა იქნება, სხვა შემთხვევაში სახელმწიფოს მოუწევს რეაგირება კანონის ფარგლებში“,- აღნიშნა კალაძემ.