პოლიტიკური ჯგუფი „გირჩი“ იმ პირთა წრის გაფართოების ინიციატივით გამოდის, ვისაც ლობისტური საქმიანობისა და ამ საქმიანობიდან შემოსავლის მიღების უფლება ექნება.

პარლამენტის ბიუროს, 22 აპრილის სხდომაზე, “გირჩის“ საკანონმდებლო პაკეტი წარედგინება, რომლის მიხედვით, ყველა პირს ექნება შესაძლებლობა, გახდეს ლობისტი. ამავე პროექტით, პოლიტიკურ გაერთიანებებს, პარლამენტისა და საკრებულოების დეპუტატებს ენიჭებათ უფლება ლობისტური საქმიანობის შედეგად შემოსავალი მიიღონ, რისი უფლებაც მათ ახლა არა აქვთ.

“გირჩის“ კანონპროექტით, ლობისტად რეგისტრაცია არ იქნება შეზღუდული მხოლოდ ერთი ნორმატიული აქტის მიღების ან გაუქმების დავალებით. პოლიტიკოსს ან და პოლიტიკურ პარტიას უფლება ექნება სამოქალაქო ხელშეკრულების საფუძველზე ურთიერთობაში შევიდეს ლობისტთან, მიიღოს დაფინანსება დავალების შესრულების ფარგლებში. ყველა ხელშეკრულება და მისგან გამომდინარე ურთიერთობა საჯარო იქნება.

ცნობისთვის, დღეს მოქმედი კანონმდებლობა საქართველოს მოქალაქის გარდა, არც ერთ სხვა პირს უფლებას არ აძლევს ლობისტად დარეგისტრირდეს. კანონით ასევე აკრძალულია პოლიტიკოსმა მატერიალური სარგებელი ლობისტური საქმიანობის ფარგლებში მიიღოს.