სპორტის მიმართ დამოკიდებულებაში, დღევანდელ და წინა ხელისუფლებას შორის განსხვავება არის ცა და დედამიწა - ფაქტია, რომ დღეს სპორტულ ასპარეზზე საქართველოს სახელი ქუხს, - ამის შესახებ საპარლამენტო უმრავლესობის დეპუტატმა, გია ვოლსკიმ ჟურნალისტებთან საუბრისას განაცხადა.

მისივე თქმით, დღეს სპორტის მიმართ დამოკიდებულება დადებითადაა შეცვლილი.

ამასთან, როგორც ვოლსკი აღნიშნავს, სპორტსმენების მიმართ ძალიან აღვირახსნილი ბულინგი მიმდინარეობს, რომ "უცხოური გავლენის გამჭვირვალობის შესახებ" კანონპროექტზე ისეთი განცხადებები გააკეთონ, რომელიც რადიკალური ოპოზიციის ინტერესებშია.

"ძალიან აღვირახსნილი ბულინგი მიმდინარეობს, რომ როგორმე სპორტსმენები გამოვიდნენ, ჩაერთონ ამ პოლიტიკურ პროცესებში და კანონის წაუკითხავად გააკეთონ ისეთი განცხადებები, რომელიც რადიკალური ოპოზიციის ინტერესებშია. უზნეობაა ეს, თუმცა პათოსი ევროპის გზისკენ, ჩვენს კონსტიტუციაშია ასახული და არც სპორტსმენების განცხადებები სცილდება ამ იდეას," - განაცხადა ვოლსკიმ.