მადლობელი ვარ აშშ-ის სენატის უკრაინისთვის სასიცოცხლოდ მნიშვნელოვანი დახმარების დამტკიცებისთვის, - ასე ეხმაურება უკრაინის პრეზიდენტი, ვოლოდიმირ ზელენსკი აშშ-ის სენატის მიერ უკრაინისთვის 61 მილიარდ დოლარამდე მოცულობის დახმარების პაკეტის დამტკიცებას.

პრეზიდენტი მადლობას უხდის უმრავლესობის ლიდერს, ჩაკ შუმერს, „რესპუბლიკელ“ ლიდერს მიჩ მაკკონელს და ყველა ამერიკელ სენატორს, რომელმაც აღნიშნული კანონპროექტის სასარგებლოდ მისცა ხმა.

„მე ასევე მადლობელი ვარ ყველა ამერიკელის, ვინც აგრძელებს უკრაინის მხარდაჭერას და აღიარებს, რომ ამ კანონპროექტის ისტორიული მნიშვნელობა სცილდება პოლიტიკას. ასევე ვაფასებ პრეზიდენტ ბაიდენის მხარდაჭერას და მოუთმენლად ველი კანონპროექტის სწრაფ ხელმოწერას და სამხედრო დახმარების შემდგომი პაკეტის მოწოდებას“, - წერს ზელენსკი სოციალურ ქსელში.

შეგახსენებთ, აშშ-ის სენატმა 95 მილიარდი დოლარის მოცულობის დახმარების პაკეტი დაამტკიცა, რომელიც უკრაინისთვის თითქმის 61 მილიარდი აშშ დოლარის გამოყოფას ითვალისწინებს.