თბილისში, პარლამენტთან „ქართული ოცნების“ მიერ ორგანიზებულ საყოველთაო-სახალხო შეკრებას ფოთიდანაც უერთდებიან. მოქალაქეები მიკროავტობუსებითა და მსუბუქი მანქანებით უკვე გაემგზავრნენ. მათი თქმით, აქციაში მონაწილეობის მიზანი ეროვნული, ტრადიციული ღირებულებების დაცვა და ხელისუფლების მხარდაჭერაა.

„არის სპეკულირება, რომ თითქოს ვიღაცები ძალით მიჰყავთ დღევანდელ აქციაზე, მაგრამ ამის დამტკიცება მარტივია ოქტომბერში. რაც შეეხება მიზანს, ყველა ვთანხმდებით, რომ გვინდა ევროპა, მაგრამ პირველ რიგში, ევროპა გვინდა ჩვენი ქვეყნის კეთილდღეობისთვის, ჩვენი მიზნების, ქართული მიზნების მისაღწევად, ამისთვის საჭიროა გადაწყვეტილებები დამოუკიდებლად მივიღოთ და ვერცერთი სხვა ქვეყნის წარმომადგენელი ვერ განსაზღვრავს, მაგალითად, უკეთესად როგორ შევუნარჩუნოთ მშვიდობა, როგორ დავიცვათ ოჯახის ღირებულებები, ჩვენი რწმენა, ჩვენი ტრადიციები. ჩვენ ვამბობთ - ღირსებით ევროპისკენ",- განაცხადა ფოთის მუნიციპალიტეტის მერმა ბექა ვაჭარაძემ.