გეგმები, რომელიც ვლადიმერ პუტინს უკრაინასთან დაკავშირებით ჰქონდა - წაეშალა ის რუკიდან და რუსეთის ნაწილი გაეხადა, აღარ არსებობს, ჩაიშალა, - ამის შესახებ აშშ-ის სახელმწიფო მდივანმა, ენტონი ბლინკენმა საუდის არაბეთის დედაქალაქ ერ-რიადში მიმდინარე მსოფლიო ეკონომიკურ ფორუმზე სიტყვით გამოსვლისას განაცხადა.

მისი თქმით, უკრაინასთან დაკავშირებით გაერთიანდნენ არა მხოლოდ აშშ და ევროპის ქვეყნები, არამედ ქვეყნები ევროპის ფარგლებს გარეთაც, რადგან ყველა აცნობიერებს, რომ ეს არის აგრესია არა მხოლოდ უკრაინის, არამედ საერთაშორისო სისტემის ფუნდამენტური პრინციპების წინააღმდეგ.

„და თუ ამ გამოწვევას დაუსჯელს დავტოვებთ, სავარაუდოა, რომ ყველგან მყოფი აგრესორები გაითვალისწინებენ და ჩვენ გვექნება უფრო მეტი და არა ნაკლები კონფლიქტის სამყარო. ბევრი ქვეყანა ეფექტურად გავაერთიანეთ, ჩვენ დავეხმარეთ წარმოუდგენლად გაბედულ უკრაინელებს აგრესიის მოგერიებაში და ახლა ეს არის მუდმივი ძალისხმევა და ბრძოლა, მაგრამ გეგმები, რომლებიც ვლადიმერ პუტინს უკრაინასთან დაკავშირებით ჰქონდა - წაეშალა ის რუკიდან და რუსეთის ნაწილი გაეხადა, აღარ არსებობს, ჩაიშალა“, - აღნიშნა ბლინკენმა.

მისი თქმით, დასავლეთს აქვს გეგმა, რომელიც დაეხმარება უკრაინას, დროთა განმავლობაში წარმატებას მიაღწიოს.

„ჩვენ გვაქვს ალიანსი ევროპაში, რომელიც უფრო ძლიერი და დიდია, ვიდრე ოდესმე ყოფილა და ვფიქრობ, გვაქვს გეგმა, რომელიც საშუალებას მისცემს უკრაინას, დროთა განმავლობაში წარმატებას მიაღწიოს და გახდეს ძლიერი ქვეყანა: სამხედრო, ეკონომიკური დემოკრატიული თვალსაზრისით“, - აღნიშნა ბლინკენმა.