“არა რუსულ კანონს” - ამ მოწოდებით ბათუმში ევროპის მოედანზე საპროტესტო აქცია დასრულდა.

ბათუმელმა სტუდენტებმა აქცია-მსვლელობა ბათუმის ქუჩებში გამართეს.

მანამდე ბათუმის უნივერსიტეტთან სიმბოლურად შეიკრიბნენ და თბილისში მიმდინარე პროცესები შეაფასეს. სტუდენტები სოლიდარობას უცხადებენ, დედაქალაქში აქციის მონაწილეებს და აცხადებენ, რომ ხვალ ბათუმიდან სტუდენტები თბილისისკენ გაემართებიან, რათა “უცხოური გავლენის გამჭვირვალობის შესახებ” კანონპროექტთან დაკავშირებით საპროტესტო აქციებში მიიღონ მონაწილეობა.

ასევე, სტუდენტები აჭარის მთავრობის სახლთანაც მივიდნენ და “ქართულ ოცნებას” მიმართეს, რომ “უცხოური გავლენის გამჭვირვალობის შესახებ” კანონპროექტი უკან გაიწვიონ.

აქციის მონაწილე სტუდენტები ამბობენ, რომ პროტესტი ბათუმში არ შეწყდება და ხვალ საღამოს მოქალაქეები კვლავ შეიკრიბებიან.