პარლამენტთან „უცხოური გავლენის გამჭვირვალობის შესახებ” კანონის მოწინააღმდეგეებს “თეთრხალათიანები“ შეუერთდნენ.

სამედიცინო სფეროს წარმომადგენლები საკანონმდებლო ორგანოსთან მსვლელობით „9 აპრილის ბაღიდან“ მივიდნენ.

მათ ხელში უჭირავთ საქართველოს დროშები და ბანერები წარწერებით: “არ ვართ პარტია. ჩვენი მოთხოვნა ევროპული მომავალია”; “ქვეყნის მომავალი/ჩვენი ჯანმრთელობა ჩვენს ხელშია”.

მათ პარლამენტთან შეკრებილები ტაშით და შეძახილებით შეხვდნენ. ისინი სკანდირებენ: “საქართველო”; “არა რუსულ კანონს”.

სამედიცინო სფეროს წარმომადგენლების თქმით, დღეს საქართველოს 30-წლიანი მონაპოვარი კითხვის ნიშნის ქვეშ დგება და ამას “არცერთი სფეროს წარმომადგენელი არ უნდა შეეგუოს”.

პარლამენტთან მობილიზებული რჩება პოლიცია. საკანონმდებლო ორგანოსთან აქცია 20:00 საათზე უნდა დაიწყოს.