რუსეთის ტერიტორიაზე ამერიკული იარაღის გამოუყენებლობის შესახებ ამერიკის შეერთებული შტატების პოზიცია არ შეცვლილა, - ასე უპასუხა პენტაგონის პრესსპიკერმა, პატრიკ რაიდერმა შეკითხვას, როგორია ვაშინგტონის დამოკიდებულება რუსეთის ტერიტორიაზე უკრაინის პოტენციურ თავდასხმებთან დაკავშირებით.

"თავდაცვის მინისტრმა ხაზგასმით აღნიშნა, რომ ჩვენი პოლიტიკა არ შეცვლილა", - აღნიშნა რაიდერმა.

მისი თქმით, შეერთებული შტატები ორიენტირებულია უკრაინის არმიისთვის საჭირო საშუალებების მიწოდების უზრუნველყოფაზე, რათა ქვეყანამ თავი დაიცვას საკუთარი ტერიტორიის ფარგლებში.

უკრაინის პრეზიდენტმა, ვოლოდიმირ ზელენსკიმ The New York Times-თან ინტერვიუში განაცხადა, რომ ოკუპანტები უკრაინას საზღვართან ახლოს მდებარე პოზიციებიდან უტევენ, რადგან ესმით, რომ უკრაინის არმია ვერ შეძლებს საპასუხო დარტყმისთვის დასავლური იარაღი გამოიყენოს. მისი თქმით, კიევმა არაერთხელ მოუწოდა აშშ-ის პრეზიდენტ ჯო ბაიდენს და სხვა ქვეყნების ლიდერებს, მათ იარაღით თავის დაცვის ნება დართონ.

ამერიკელი კონგრესმენების ჯგუფმა ოფიციალურად მიმართა აშშ-ის თავდაცვის მინისტრს თხოვნით, რომ უკრაინას გარკვეულ გარემოებებში რუსეთის ფედერაციის ტერიტორიაზე სტრატეგიულ სამიზნეებზე დარტყმის უფლება მისცეს.