ბსუ-ს სინოპის უნივერსიტეტის დელეგაცია ეწვია
ბათუმის შოთა რუსთაველის სახელმწიფო უნივერსიტეტს სინოპის უნივერსიტეტის დელეგაცია სინოპის უნივერსიტეტის რექტორის მოადგილის, პროფესორ მუჰითდინ ილმაზის ხელმძღვანელობით ეწვია.
აღნიშნულის შესახებ ინფორმაციას ბათუმის შოთა რუსთაველის სახელმწიფო უნივერსიტეტი ავრცელებს.
მათივე ცნობით, ბსუ-ს რექტორთან, პროფესორ მერაბ ხალვაშთან გამართულ შეხვედრაზე სინოპის უნივერსიტეტის წარმომადგენლებმა უნივერსიტეტებს შორის ტურიზმისა და არქეოლოგიის მიმართულებით თანამშრომლობის გაღრმავებასა და სამომავლო გეგმებზე იმსჯელეს.
„დაიგეგმა ერთობლივი პროექტების განხორციელება, სტუდენტებისა და პროფესორ-მასწავლებლებისათვის გაცვლითი პროგრამების ამოქმედება და სამეცნიერო კონფერენციის ჩატარება. შეხვედრის ფარგლებში, ბსუ-ს რექტორმა, პროფესორმა მერაბ ხალვაშმა და სინოპის უნივერსიტეტის რექტორის მოადგილემ, პროფესორმა მუჰითდინ ილმაზიმ თანამშრომლობის მემორანდუმს მოაწერეს ხელი.
ასევე, შეხვედრას ესწრებოდნენ ბსუ-ს ადმინისტრაციის ხელმძღვანელი, მერაბ დიასამიძე, ტურიზმის ფაკულტეტის დეკანი, ირაკლი კორძაია და სტრატეგიული განვითარებისა და საგარეო ურთიერთობათა დეპარტამენტის უფროსი, მარინე გიორგაძე“, - აღნიშნულია ინფორმაციაში.
