დიასპორისა და კავკასიის საკითხთა, კულტურის და სპორტის კომიტეტების ერთობლივ სხდომაზე 2024 წლის სახელმწიფო ბიუჯეტის შესრულების 3 თვის მიმოხილვის თაობაზე ინფორმაცია მოისმინეს.

საკითხი კომიტეტის წევრებს ფინანსთა მინისტრის პირველმა მოადგილემ გიორგი კაკაურიძემ გააცნო.

კაკაურიძის თქმით, კულტურის და სპორტის სამინისტროს ნაწილში 110.8 მლნ ლარია ათვისებული და შესრულების მაჩვენებელი არის დაახლოებით 90%, ხოლო, საგარეო საქმეთა სამინისტროს შემთხვევაში, 51 მლნ ლარია ათვისებული და შესრულების მაჩვენებელი 92%-მდეა.

გიორგი კაკაურიძემ განსაკუთრებული ყურადღება პროგრამული ნაწილის ათვისებაზე გაამახვილა.

“სახელოვნებო და სასპორტო დაწესებულებების ხელშეწყობაში შესრულების მაჩვენებელი არის 92%, კულტურის განვითარების ხელშეწყობაში 90%-ზე მეტია, კულტურული მემკვიდრეობის დაცვის კუთხით - 85%, სპორტის დაფინანსება - 93% კულტურისა და სპორტის მოღვაწეთა სოციალურ დახმარებაში 92%-ია ათვისებული. დიასპორულ პოლიტიკაში 840 000 ლარამდეა ათვისებული და შესრულების მაჩვენებელი ამ კუთხით 82%-ია",- განაცხადა გიორგი კაკაურიძემ.

კომიტეტების გაერთიანებულ სხდომაზე წარმოდგენილი ინფორმაცია ცნობად მიიღეს.