გენადი არველაძე - საქართველოსთვის კორეის რესპუბლიკა რეგიონში მნიშვნელოვანი სავაჭრო და ეკონომიკური პარტნიორია

კორეის რესპუბლიკის დედაქალაქ სეულში, 29-31 მაისს, ორ ქვეყანას შორის ეკონომიკური პარტნიორობის შესახებ მოლაპარაკების მეორე რაუნდი გაიმართა - მისი დასრულების შემდეგ, მხარეებმა პოზიტიურად შეაფასეს მოლაპარაკების შედეგები და აღნიშნეს, რომ ძირითად საკითხებთან დაკავშირებით გარკვეულ შეთანხმებებს მიაღწიეს.

ამის შესახებ ინფორმაციას ეკონომიკისა და მდგრადი განვითარების სამინისტრო ავრცელებს.

„იმედი გვაქვს, რომ მოლაპარაკების მომდევნო რაუნდი, რომელიც თბილისში გაიმართება, იქნება საბოლოო, რომლის შემდეგაც შესაძლებელი იქნება შეთანხმებაზე ხელმოწერა. საქართველოსთვის კორეის რესპუბლიკა მნიშვნელოვანი სავაჭრო და ეკონომიკური პარტნიორია რეგიონში და მასთან ურთიერთობის გაღრმავება დადებითად აისახება ორივე ქვეყნის ეკონომიკაზე. ვფიქრობთ, შეთანხმება არა მხოლოდ წაახალისებს ორმხრივ ვაჭრობას, არამედ ხელს შეუწყობს თანამშრომლობას ეკონომიკის სხვადასხვა სექტორებში, მათ შორის, ინვესტიციების კუთხითაც“, - განაცხადა საქართველოს დელეგაციის ხელმძღვანელმა, ეკონომიკისა და მდგრადი განვითარების მინისტრის მოადგილე გენადი არველაძემ მოლაპარაკების დასრულების შემდეგ.

მისივე თქმით, კორეის რესპუბლიკა მაღალმსყიდველუნარიანი 50 მლნ-ზე მეტი მოსახლეობით პრიორიტეტული ბაზარია საქართველოსთვის, რომლის ეკონომიკური პოლიტიკის ქვაკუთხედსაც ბაზრების დივერსიფიცირება წარმოადგენს. მან განსაკუთრებული ყურადღება გაამახვილა კორეის რესპუბლიკაში ქართული ღვინის, მინერალური და უალკოჰოლო სასმელების, აგროსამრეწველო და მთელი რიგი სამრეწველო პროდუქციის ექსპორტის გაზრდის შესაძლებლობებზე. გარდა ამისა, გენადი არველაძის ინფორმაციით, არსებობს კორეელების მხრიდან არსებობს დაინტერესება საქართველოს ენერგეტიკის, ტრანსპორტის, ლოგისტიკის, სამოქალაქო ავიაციისა და ტურიზმის სექტორების მიმართაც.

„აღსანიშნავია, რომ საქართველოს მხრიდან მომლაპარაკებელთა ჯგუფს ხელმძღვანელობდა ეკონომიკისა და მდგრადი განვითარების მინისტრის მოადგილე გენადი არველაძე, კორეის რესპუბლიკის მხრიდან კი – ვაჭრობის, ინდუსტრიისა და ენერგეტიკის სამინისტროს სავაჭრო მოლაპარაკების დეპარტამენტის გენერალური დირექტორი ფეომინ რიუ. მოლაპარაკებებში ასევე მონაწილეობდნენ შემოსავლების სამსახურის, სურსათის ეროვნული სააგენტოს, საქპატენტის და სხვა სახელმწიფო უწყებების წარმომადგენლები.

შეთანხმება მოიცავს ისეთ საკითხებს, როგორებიცაა საქონლითა და მომსახურებით ვაჭრობა, წარმოშობის წესები, საბაჟო პროცედურები, სანიტარული და ფიტოსანიტარიული ზომები, ვაჭრობაში ტექნიკური ბარიერები და სხვა ეკონომიკური თანამშრომლობის სფეროები, როგორებიცაა ტრანსპორტი, ენერგეტიკა და ინვესტიციები“, - ნათქვამია უწყების მიერ გავრცელებულ ინფორმაციაში.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024