უნდა ვთქვა, რომ დღეს, ორივე მხარეს როდესაც ვამბობთ, სამწუხაროდ, ოპოზიცია და უფრო საპროტესტოდ განწყობილი საზოგადოებაა, რომელიც აქტიურად ეწევა ძალადობრივი აქტივობების პროპაგანდას, ხდება ოჯახის წევრების პირადი ინფორმაციის გავრცელება - ეს დაუშვებელია, - ამის შესახებ ჯანდაცვის მინისტრმა, მიხეილ სარჯველაძემ ჟურნალისტებს განუცხადა, როდესაც უპასუხა შეკითხვას, მათ შორის ‘ნაციონალური მოძრაობის“ სათავო ოფისზე თავდასხმაზე.

მანამდე კი, ჯანდაცვის მინისტრმა აღნიშნა, რომ საერთოდ, ძალადობრივი არცერთი ფორმა, მოვლენების რადიკალიზაცია მისაღები არ არის ადა ამას მკაცრად ემიჯნებიან.

„არცერთი მიმართულებით, ვინც არ უნდა იყოს, მოქმედი მხარე, გინდა დაზარალებული, გინდ აგრესორი, რომელიც მიმართავს კანონგარეშე აგრესიულ ფორმებს, რა თქმა უნდა, ეს მისაღები არ არის, მაგრამ უნდა ვთქვა, რომ დღეს, ორივე მხარეს როდესაც ვამბობთ, სამწუხაროდ, ოპოზიცია და უფრო საპროტესტოდ განწყობილი საზოგადოებაა, რომელიც აქტიურად ეწევა ძალადობრივი აქტივობების პროპაგანდას,მათ შორის როდესაც საჯაროდ, გარკვეულ სივრცეებში ხდება ოჯახის წევრების პირადი ინფორმაციის გავრცელება და ეს მარტო იმიტომ, რომ ეს ხალხი ბულინგში მოაქციონ, ადამიანები, რომლებსაც არ შეიძლება მოვიაზრებდეთ ნებისმიერი ძალის ადრესატად. ეს დაუშვებელია, მიუღებელია და მინდა, ყველას ვთხოვო, რომ ასეთი ქმედებებისგან თავი შეიკავონ, ეს იმისთვის, რომ შემდგომ ეს ყველაფერი კიდევ უფრო არ გამწვავდეს.

ყველაზე მნიშვნელოვანი, ალბათ, არის ის, რომ ისეთი ინიციატივები, რომელსაც თვალს ვადევნებთ, როდესაც ადამიანებს აგრესიისკენ მოუწოდებენ და ამას ძირითადად ვხვდებით ოპოზიციურად განწყობილი ხალხის მხრიდან. საჯარო სივრცეებში, მათ შორის სოციალური ქსელებია, როდესაც აგრესიის წახალისების გამოვლინებას ვადევნებთ თვალს, რა თქმა უნდა, ამ ყველაფრის მიმართ ვერცერთ შემთხვევაში ვერ ვიქნები პოზიტიურად განწყობილი. ეს არის ის, რაც უნდა აღიკვეთოს, ეს არის ის, რაც წარმოშობს და მათ შორის პროვოცირებს შემდგომი აგრესიის გაგრძელებას, ეს არის უაღრესად მიუღებელი რამ”, - განაცხადა სარჯველაძემ.