წყალი ნებისმიერ შემთხვევაში იმდენად დიდი პრობლემაა, რის გამოც შეიძლება, რესტორანმა მუშაობა მთლიანად შეწყვიტოს - წყლის ერთი კვირით გაჩერება თბილისში კოლაფსია - აქ საუბარი არა მარტო რესტორნებზე, სასტუმროებზეცაა, რომელთაც წყლის რეზერვუარები არ აქვთ,- ამის შესახებ „რესტორატორთა ასოციაციის“ თავმჯდომარემ, შოთა ბურჯანაძემ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.

ბურჯანაძის თქმით, წყლის თვითმომარაგება გრძელვადიან პერსპექტივაში წარმოუდგენელია.

„წყალი ნებისმიერ შემთხვევაში იმდენად დიდი პრობლემაა, რის გამოც ამ პერიოდში, შეიძლება, რესტორანმა მუშაობა მთლიანად შეწყვიტოს თუ ის წყლის მოწოდებას ვერ უზრუნველყოფს. ამის საშიშროება, რა თქმა უნდა, არის. ერთი და ორი დღე შეიძლება ეს პრობლემა გადაჭრილი იყოს თვითმომარაგების კუთხით, მაგრამ ეს მუდმივი რეჟიმით ვერ იქნება ჰიგიენიდან გამომდინარე. ამ კუთხით წყლით მთლიანად უზრუნველყოფა გრძელვადიან პერსპექტივაში წარმოუდგენელია. ერთი კვირა ის პერიოდია, როდესაც [უწყლოდ] რესტორანმა მუშაობა შეიძლება შეწყვიტოს. აქ საუბარი არამარტო რესტორანზე, სასტუმროებზეცაა. მათ 200-300 სტუმარი ჰყავთ და წყალი პირველი მოთხოვნილებაა. ვერც ერთი რეზერვუარი ამას ვერ შეავსებს. დღეს ინფრასტრუქტურა ისე არ არის მოწესრიგებული, რომ დიდი რეზერვუარი ჰქონდეს სახურავზე რომელიმე სასტუმროს და ის შეივსოს. წყლის ერთი კვირით გაჩერება თბილისში კოლაფსია. სასტუმროებს სხვა სასტუმროებში მოუწევთ სტუმრების გადანაწილება. რესტორანმა კი შეიძლება ბევრი სტუმარი არ მიიღოს, მხოლოდ განსაზღვრული რაოდენობა“,- განაცხადა შოთა ბურჯანაძემ.

გარდა ამისა, ბურჯანაძემ ისაუბრა ტურიზმის მხრივ არსებულ ვითარებაზეც და აღნიშნა, რომ „უცხოური გავლენის გამჭვირვალობის შესახებ“ კანონის მიღების შემდგომ, ჯავშნები გაუქმებულია და მომავალი ჯავშნების მოლოდინიც დაბალია.

„ჩვენი დიდი მოლოდინი იყო, რომ ეს სეზონი იქნებოდა ერთ-ერთი საუკეთესო საქართველოში ტურისტული მოთხოვნების კუთხით. თუმცა არსებული სიტუაციიდან გამომდინარე, კანონის [„უცხოური გავლენის გამჭვირვალობის შესახებ“] მიღებიდან გამომდინარე მოთხოვნა ძალიან შემცირდა, მინიმუმამდეა დაყვანილი. ძალიან ცუდია ის ფაქტი, რომ ჯავშნები გაუქმებულია და შემდეგი ჯავშნების მოლოდინიც ძალიან დაბალია. ერთადერთი ნათელი წერტილი ამ კუთხით შეიძლება იყოს აჭარა, მაგრამ არც იქ არის ის მდგომარეობა, რისი მოლოდინიც იყო. შესაბამისად, ვფიქრობ, რომ ეს პერიოდი ერთ-ერთი რთული იქნება იმ კოვიდ ვითარების შემდგომ, რომელიც გამოვლილი გვაქვს“,- აღნიშნა ბურჯანაძემ.