საქართველოს სახალხო დამცველის აპარატმა ადგილობრივი და საერთაშორისო ორგანიზაციების მონაწილეობით არჩევნების თემაზე სამუშაო შეხვედრა გამართა, რომლის მიზანი იყო სახალხო დამცველის მანდატისა და არჩევნებთან დაკავშირებული საკითხების მოკვლევა-შესწავლის შესახებ ინფორმაციის მიწოდება და მონაწილე მხარეებისგან არსებული გამოწვევების შესახებ ინფორმაციის მიღება.
ამის შესახებ ინფორმაციას სახალხო დამცველის აპარატი ავრცელებს.
„სახალხო დამცველის ლევან იოსელიანის განაცხადებით, გაზრდილი პოლარიზაციის პირობებში აპარატის მიმართ დიდი მოლოდინებია, რომელიც მიუხედავად შეზღუდული მანდატისა და რესურსებისა, მზად არის მოიკვლიოს და შეისწავლოს ყველა მოპოვებული ინფორმაცია.
ასევე აღნიშნა აპარატის რეგიონული წარმომადგენლობების მზადყოფნა წინასაარჩევნო პერიოდში და კენჭისყრის დროს უფლებების დარღვევის ფაქტებზე შესაბამისი რეაგირების კუთხით.
სახალხო დამცველის პირველმა მოადგილემ თამარ გვარამაძემ ინფორმაციის მიღების საკითხებზე წინასაარჩევნო პერიოდში დარღვევების შესახებ ისაუბრა, რაც ეფექტიანი რეაგირების და გრძელვადიანი გადაწყვეტილების საშუალებას იძლევა. ასევე, ისაუბრა ძალადობის აქტებისა და დაკავებების დროს რეაგირების არსებული მექანიზმის მნიშვნელობასა და კოორდინაციის გაუმჯობესებაზე.
მონაწილეებმა არაორდინალური გარემოებების პირობებში, წინასაარჩევნო და არჩევნების პროცესებში აპარატის უფრო აქტიური ჩართულობის მნიშვნელობაზე ასევე, აქციების დროს დაკავებულთა მოძიებასა და მათი უფლებების მონიტორინგის საკითხებში აპარატთან ეფექტიან თანამშრომლობაზე ისაუბრეს.
შეხვედრაზე, მონაწილეებმა ხაზი გაუსვეს არასამთავრობო სექტორზე გამჭვირვალობის შესახებ საქართველოს კანონის უარყოფით გავლენას.
შეხვედრა გაიმართა USAID-PDO პარტნიორობის პროგრამის ფარგლებში ამერიკელი ხალხის მხარდაჭერით, აშშ-ს საერთაშორისო განვითარების სააგენტოს (USAID) დახმარებით“,- აღნიშნულია ინფორმაციაში.