საოცარი ფეხბურთი აჩვენა ჩვენმა ეროვნულმა ნაკრებმა, სული და გული ჩადეს, - ამის შესახებ თბილისის მერმა, კახა კალაძემ გერმანიაში, საქართველოს ნაკრების გამარჯვების შემდეგ განაცხადა.
კალაძის თქმით, საქართველოს წინ კიდევ ბევრი წარმატება ელოდება.
„მინდა საქართველოს მივულოცო ეს გამარჯვება. ვფიქრობ, რომ ყველას ვისაც ჩვენი ქვეყნის წარმატება უხარია დღეს არის უბედნიერესი. საოცარი ფეხბურთი აჩვენა ჩვენმა ეროვნულმა ნაკრებმა, სული და გული ჩადეს. მინდა ქართველ გულშემატკივარს ვუთხრა მადლობა ქომაგობისთვის. ვულოცავ სრულიად საქართველოს, წინ კიდევ ბევრი წარმატება გველოდება“,- განაცხადა კალაძემ.
ევროპის ჩემპიონატის ჯგუფური ეტაპის მესამე მატჩში საქართველომ ისტორიული გამარჯვება მოიპოვა, პორტუგალიის ნაკრები 2:0 დაამარცხა და მერვედფინალში გავიდა. მატჩის პირველი გოლი შეხვედრის დაწყებიდან მეორე წუთზე ხვიჩა კვარაცხელიამ გაიტანა, ხოლო მეორე გოლი, მეორე ტაიმში, პენალტით გიორგი მიქაუტაძემ გაიტანა.
30 ივნისს, მერვედფინალში საქართველო ესპანეთს დაუპირისპირდება.
როგორც ცნობილია, ევროპის ჩემპიონატზე პირველი მატჩი საქართველოს ნაკრებმა 18 ივნისს, თურქეთთან გამართა და 1:3 დამარცხდა, ხოლო 22 ივნისს გამართულ მეორე მატჩში ჩეხეთის ნაკრებთან შეხვედრა ფრედ, 1:1 დაასრულა, შესაბამისად, ევროპის ჩემპიონატზე პირველი ქულა მოიპოვა.