საფრანგეთის ქუჩებში, რიგგარეშე საპარლამენტო არჩევნების მეორე ტურის ხმების დათვლის პარალელურად, ათასობით ადამიანი ქუჩებში გამოვიდა და არჩევნების ეგზიტპოლების თანახმად გამოცხადებული შედეგები იზეიმა.

მედიის ინფორმაციით, დემონსტრაციების უმეტესობა მშვიდობიანი იყო, თუმცა, იყო არეულობისა და ვანდალიზმის ფაქტებიც. ქალაქ ნანტში არეულობის ჩასახშობად სპეცრაზმმა ცრემლსადენი გაზი გამოიყენა.

ამასთან, პარიზის ცენტრალურ მოედანზე, სადაც დემონსტრანტების უმეტესობა ახალგაზრდა იყო, პოლიციამ მათ დასაშლელად ცრემლსადენი გაზი გამოიყენა.

შეგახსენებთ, ეგზიტპოლის შედეგების თანახმად, საფრანგეთის საპარლამენტო არჩევნებში პირველ ადგილს მემარცხენეთა ალიანსი იკავებს. მეორე ადგილზეა პრეზიდენტ ემანუელ მაკრონის ცენტრისტული ალიანსი, მესამეზე კი - ულტრამემარჯვენე პარტია „ეროვნული გაერთიანება“, რომელმაც არჩევნების პირველ ტურში გაიმარჯვა.