პარლამენტის პირველი ვიცე-სპიკერის გია ვოლსკის განცხადებით, ბრალდებები იმის თაობაზე, რომ დასავლეთს საქართველოში მეორე ფრონტის გახსნა და გადატრიალების მოწყობა სურს, ხელისუფლების წარმომადგენელთა ბრალდებები არ იყო.

როგორც მან ამ კონტექსტში განმარტა, ხელისუფლება მხოლოდ ცალკეული უცხოელი პოლიტიკოსების განცხადებებს ეხმაურებოდა.

„არა, ეს ჩვენი ბრალდებები არ იყო! მაგალითად, ჩვენ შევაფასეთ ესტონეთის პრემიერ მინისტრისა და ევროკომისრის კაია კალასის განცხადება, რომლის ქმარმაც ომის შემდეგ, რუსეთთან ბიზნესის წარმოებით დიდი მოგება მიიღო. კალასმა განაცხადა, რომ უცხოელი საგარეო საქმეთა მინისტრების ანტისამთავრობო მიტინგში მონაწილეობა ძალიან კარგია, ვინაიდან სწორედ ასე იწყებოდა მაიდანი. ეს ვთქვით არა ჩვენ, არამედ მან! ჩვენ სწორედაც მის ნათქვამზე გავაკეთეთ კომენტარი.

როდესაც ჩვენ საქართველოსთვის სტატუსის მონიჭების საკითხზე ვსაუბრობდით, ამას პირდაპირ დაემთხვა უკრაინის მხრიდან საქართველოსთან დიპლომატიური ურთიერთობების გაწყვეტა - უკრაინამ ელჩი მხოლოდ იმის გამო გაიწვია, რომ არ გავაგზავნეთ გარკვეული იარაღი და ასევე, არ გავგზავნეთ მოხალისეები ორგანიზებულად. ამას კიდევ დაემთხვა სტატუსის თემით გარკვეული მანიპულაციები მაშინ, როცა ყველა მონაცემით უკრაინასა და მოლდოვაზე წინ ვიყავით.

გამომდინარე აქედან, გაჩნდა ლოგიკური ეჭვი იმისა, რომ ჩვენ იმის გამო ვისჯებით, რომ უკრაინის ამ კატეგორიულ, რადიკალურ მოთხოვნას არ ავყევით, რომ საომარ მოქმედებებში ჩავრთულიყავით“, - განაცხადა გია ვოლსკიმ.