კრიტიკა და მცდელობა, რომ რაღაცნაირად გადაიფაროს ეს ჰუმანური აქტი, რომელსაც ხელისუფლება ახორციელებს და რომელსაც აუცილებლად ბოლომდე მიიყვანს, არასწორია - მზაობას გამოვთქვამთ, ნებისმიერი საკითხი განვიხილოთ, თუკი ის შესაბამის არგუმენტაციას ეხება, - ამის შესახებ "ქართული ოცნების" დეპუტატმა, გივი მიქანაძემ ამნისტიის კანონპროექტზე საუბრისას განაცხადა.

მისივე თქმით, ამნისტიის კანონპროექტს სისხლის სამართლის კოდექსის მუხლების ძალიან დიდი დაფარვა აქვს.

"ამნისტიის კანონის შედეგად, ათასზე მეტი ადამიანი მყისიერად უნდა გათავისუფლდეს პატიმრობიდან და რამდენიმე ათას ბრალდებულს და მსჯავრდებულს სასჯელის ვადა შეუმცირდება. ამ ფონზე გაკეთებული განცხადებები და ერთგვარი საპროტესტო აქცია, რომ თითქოსდა, ამნისტიის კანონი არ შეესაბამება ბრალდებულთა და მსჯავრდებულთა ინტერესებს, არასწორია. კანონი სისხლის სამართლის კოდექსის 300 მუხლს ეხება და ეს პირდაპირ მიუთითებს, თუ როგორი მასშტაბური და მოცულობითია ამნისტია. ამიტომ ეს კრიტიკა და მცდელობა, რომ რაღაცნაირად გადაიფაროს ეს ჰუმანური აქტი, რომელსაც ხელისუფლება ახორციელებს და რომელსაც აუცილებლად ბოლომდე მიიყვანს, არასწორია.

ჩვენ აბსოლუტურად გამოვთქვათ მზაობას, ნებისმიერი საკითხი განვიხილოთ, თუკი ის შესაბამის არგუმენტაციას ეხება. წინ გვაქვს მეორე მოსმენა, რომელიც მუხლობრივ განხილვას შეეხება. აქაც შესაძლოა ბევრი წინადადება შემოვიდეს და ჩვენ ყოველთვის მზად ვართ ამ წინადადებების განხილვისთვის," - განაცხადა მიქანაძემ.