ეთიკის ქარტიის საბჭომ საქართველოს ცენტრალური საარჩევნო კომისიის თავმჯდომარის მოვალეობის შემსრულებლის, გიორგი კალანდარიშვილის განცხადება განიხილა “ტვ პირველის” ჟურნალისტების ნოდარ მელაძისა და მაკა ჩიხლაძის წინააღმდეგ. ქარტიის საბჭოს გადაწყვეტილებით, სადავო მასალაში ჟურნალისტებმა დაარღვიეს ქარტიის 1-ლი, მე-5, მე-7 და მე-8 პრინციპები, - ინფორმაციას ჟურნალისტური ეთიკის ქარტია ავრცელებს.

„სადავო მასალა ეთერში 2024 წლის 2 მარტს გავიდა. ის ეხებოდა საქართველოს ცენტრალური საარჩევნო კომისიის თავმჯდომარის მოვალეობის შემსრულებლის გიორგი კალანდარიშვილისა და მისი ოჯახის ქონებას. განმცხადებლის პოზიციით, ეთერში გასულ გადაცემაში „ნოდარ მელაძის შაბათი“ ჟურნალისტებმა არასწორი, გადაუმოწმებელი და მანიპულაციური ინფორმაცია გაავრცელეს.

მოპასუხე ჟურნალისტები სხდომას არ დასწრებიან და არც თავიანთი შეპასუხება წარმოუდგენიათ, თუმცა, ელექტრონულად წარმოადგინეს „ნოდარ მელაძის შაბათის“ გუნდის ახსნა-განმარტება, რომელიც ტელეკომპანია “პირველის” თვითრეგულირების კომისიას წარედგინა ამავე მასალასთან დაკავშირებული საჩივრის განხილვისას.

ქარტიის საბჭოს გადაწყვეტილებით, სადავო მასალაში ჟურნალისტებმა დაარღვიეს ქარტიის პირველი, მე-5, მე-7 და მე-8 პრინციპები,“ - აღნიშნულია გავრცელებულ ინფორმაციაში.