ოლიმპიური თამაშების გახსნის ცერემონიის წინ, საფრანგეთის ჩქაროსნულ სარკინიგზო ქსელზე რამდენიმე თავდასხმა განხორციელდა, - ამის შესახებ ინფორმაციას საფრანგეთის რკინიგზის ეროვნული კომპანია SNCF-ი ავრცელებს.

„ეს ფართომასშტაბიანი თავდასხმაა, რომელიც მიზნად ქსელის პარალიზებას ისახავს. ღამით, SNCF რამდენიმე წინასწარგანზრახული თავდასხმის მსხვერპლი გახდა“, - განაცხადეს კომპანიაში.

საფრანგეთის ეროვნული რკინიგზის ცნობით, კომპანიის ობიექტებს ცეცხლი განზრახ წაუკიდეს და დაზიანებულ ხაზებზე მოძრაობა შეფერხდა.

კომპანიის განცხადებით, ბევრი რეისი გაუქმდება და შექმნილი სიტუაცია შაბათ-კვირის განმავლობაშიც გაგრძელდება, იქამდე, სანამ სარემონტო სამუშაოები არ დასრულდება.