რატი ბრეგაძე ევროპის საბჭოს გენერალური მდივნისა და ლიეტუვის იუსტიციის მინისტრის მიწვევით ევროსაბჭოს მაღალი დონის კონფერენციაში მონაწილეობს. ამის შესახებ ინფორმაციას იუსტიციის სამინისტრო ავრცელებს.

როგორც გავრცელებულ ინფორმაციაშია ნათქვამი, კონფერენცია ეძღვნება საერთაშორისო დანაშაულებისთვის მართლმსაჯულების აღსრულების მნიშვნელობას; განსაკუთრებული ყურადღება უკრაინაში ჩადენილ დანაშაულებს ეთმობა.

„სიტყვით გამოსვლისას მინისტრმა ისაუბრა ოკუპაციაზე და ყურადღება გაამახვილა 2008 წლის რუსეთ-საქართველოს ომის შემდეგ მტკიცებულებების შეგროვების სირთულეებზე; ასევე, ინფორმაციისა და მტკიცებულებების დროული შეგროვებისა და საქმეში დამაგრების საჭიროებაზე.

მინისტერიალი ევროპის საბჭოს თავმჯდომარეობის ფარგლებში ლიეტუვის რესპუბლიკის ორგანიზებით იმართება. საქართველოს დელეგაციას იუსტიციის მინისტრი რატი ბრეგაძე ხელმძღვანელობს. დელეგაციის შემადგენლობაში, აგრეთვე, არიან იუსტიციის მინისტრის მოადგილე ბექა ძამაშვილი და ლიეტუვაში საქართველოს საგანგებო და სრულუფლებიანი ელჩი სალომე შაფაქიძე“, - ნათქვამია ინფორმაციაში.