"ქართული ოცნება- დემოკრატიული საქართველოს" დელეგატობის კანდიდატი ახალქალაქში სამველ მანუკიანი სოფლების: კარწახის, ფილიპოვკას, ხავეთის, აფნიასა და ერიჯანას მოსახლეობას შეხვდა.

პარტიის პრესსამსახურის მიერ გავრცელებული ინფორმაციით, შეხვედრაზე მოსახლეობა გაეცნო წინასაარჩევნო პროგრამას, დელეგატობის კანდიდატმა მათ ასევე მიაწოდა ინფორმაცია სამომავლო გეგმებთან, დაგეგმილ და განხორციელებულ პროექტებთან დაკავშირებით.

„მსურს ჩემი სიხარული გაგიზიაროთ იმ ფაქტთან დაკავშირებით, რომ ჩვენს მუნიციპალიტეტებში არაერთი დადებული პირობა შევასრულეთ. კერძოდ, სოფელ კარწახსა და ხავეთში მოპირკეთდა გზა, რომელიც ადამიანებს დღემდე არ ჰქონიათ წლებია. ასევე, მოგვარებულია სასმელი წყლისა და განათების საკითხები. ჩვენი ამოცანაა, რომ მომავალ თაობას, ჩვენს შვილებს ჩვენი ქვეყანა გადავცეთ თავისუფალი, დამოუკიდებელი, ერთიანი და ძლიერი”,- განაცხადა სამველ მანუკიანმა.

შეხვედრას ასევე ესწრებოდნენ, საკრებულოს თავმჯდომარე ნაირი ირიციანი და მერი მელქონ მაკარიანი, „ქართული ოცნების“ სხვა წარმომადგენლებთან ერთად.