სამხედროებზე თავდასხმის შემდეგ კოლუმბიამ „ეროვნულ-განმათავისუფლებელ არმიასთან“ სამშვიდობო მოლაპარაკებები შეაჩერა, - ამის შესახებ განცხადებას კოლუმბიის მთავრობის სამშვიდობო დელეგაცია ავრცელებს.

„დღეს, დიალოგის პროცესი შეჩერებულია. მისი სიცოცხლისუნარიანობა სერიოზულად შეირყა და მისი უწყვეტობა შეიძლება მხოლოდ „ეროვნულ-განმათავისუფლებელი არმიის“ მშვიდობიანი ნების ცალსახა გამოხატვით აღდგეს“, - ნათქვამია განცხადებაში.

კოლუმბიის შეიარაღებული ძალების განცხადებით, მემარცხენე აჯანყებულმა დაჯგუფებამ არაუკის დეპარტამენტში მდებარე სამხედრო ბაზას თვითნაკეთი რაკეტები ესროლა, რის შედეგადაც, 2 სამხედრო დაიღუპა და 20-ზე მეტი დაშავდა.

დაჯგუფებას თავდასხმაზე პასუხისმგებლობა არ აუღია.

ცნობისთვის, „ეროვნულ-განმათავისუფლებელმა არმიამ“ კოლუმბიის მთავრობასთან ცეცხლის შეწყვეტის შეთანხმება აგვისტოში დაასრულა, თუმცა სამშვიდობო მოლაპარაკებების პროცესში კვლავ ჩართული იყო.