საქართველოს ტექნიკური უნივერსიტეტის სატრანსპორტო სისტემებისა და მექანიკის ინჟინერიის ფაკულტეტი ახალ, 2024/2025 სასწავლო წელს მე-8 ქართულ-პოლონური საერთაშორისო სამეცნიერო კონფერენციით - „სატრანსპორტო ხიდი ევროპა-აზია“ იწყებს.

ამის შესახებ ინფორმაციას საქართველოს ტექნიკური უნივერსიტეტი ავრცელებს.

მისივე ცნობით, ქართულ-პოლონურ საერთაშორისო სამეცნიერო კონფერენციაში, რომლის თანაორგანიზატორები, საქართველოს ტექნიკურ უნივერსიტეტთან ერთად, სილეზინის ტექნოლოგიური უნივერსიტეტი (გლივიცე, პოლონეთი), აკაკი წერეთლის სახელმწიფო უნივერსიტეტი (ქუთაისი, საქართველო) და რაფიელ დვალის მანქანათა მექანიკის ინსტიტუტი, ხოლო სპონსორები და პარტნიორები არიან კომპანიები „ავტოტექნო“, „ლაიონ ტრანსი“, „გრინვეი“ და „ავტობანი“, 70-ზე მეტი მეცნიერი მონაწილეობს, მათ შორის, ევროპის სხვადასხვა პარტნიორი უნივერსიტეტების 20-ზე მეტი მკვლევარი.

საქართველოს ტექნიკური უნივერსიტეტის სატრანსპორტო სისტემებისა და მექანიკის ინჟინერიის ფაკულტეტის დეკანის, პროფესორ ბორის გითოლენდიას თქმით, ერთიანი ეროვნული გამოცდებით ფაკულტეტზე სრული შევსებაა და საერთო ჯამში, ჩაირიცხა: 216 ბაკალავრი, 30 მაგისტრანტი და 3 დოქტორანტი, მობილობით კი ფაკულტეტზე 73 სტუდენტი აგრძელებს სწავლას.

„მიღებულ სტუდენტთა რაოდენობრივი მაჩვენებელი საუკეთესოა ბოლო 5 წლის განმავლობაში, ხოლო თუ გავითვალისწინებთ მოქმედი საგანმანათლებლო პროგრამების ამჟამად მოქმედ რაოდენობას, მაშინ შედეგი საუკეთესოა ბოლო 10 წლის მონაცემებთან შედარებით. 2024-2025 სასწავლო წლის ორგანიზებისთვის ფაკულტეტზე განხორციელდა არაერთი ღონისძიება სასწავლო და დამხმარე ინფრასტრუქტურის მოსაწესრიგებლად. საქართველოს ტექნიკური უნივერსიტეტის რექტორის, აკადემიკოს დავით გურგენიძისა და ადმინისტრაციის მხარდაჭერით, განახლდა და გარემონტდა სასწავლო, დამხმარე და ლაბორატორიული ფართები, კერძოდ: მოწესრიგდა და სრულად განახლდა პირველი სასწავლო კორპუსის სველი წერტილები; განახლდა და გარემონტდა ურთიერთ-შეცვლადობის ლაბორატორია, სასწავლო აუდიტორიები და თანამშრომელთა სამუშაო სივრცეები. მექანიკის ინჟინერიის ინგლისურენოვანი პროგრამისათვის შეიქმნა სასწავლო აუდიტორია, ასევე, მოეწყო სტუდენტური სივრცე და აღიჭურვა შესაბამისი ინვენტარით. გერმანული კომპანია ELREHA-სა და საქართველოს მემაცივრეთა ასოციაციის მხარდაჭერით, გარემონტდა და თანამედროვე ინვენტარით აღიჭურვა სასწავლო-პრაქტიკული აუდიტორია, სადაც დაგეგმილია პროფესიული გადამზადების პროგრამის - „მაცივარაგენტზე მომუშავე მოწყობილობების მომსახურება“ განხორციელება. გარდა ამისა, საქართველოს განათლებისა და მეცნიერების სამინისტროს ინოვაციის ინკლუზიურობის და ხარისხის პროგრამის - „საქართველო I2Q (IBRD)“ ეგიდით, მსოფლიო ბანკის დაფინანსებული პროექტის - „კვლევებისა და ინოვაციების მხარდამჭერი პროგრამა - ReInnova” ფარგლებში, გარემონტდა და უახლესი ინვენტარითა და აპარატურით აღიჭურვა თანამედროვე კონცეფციის სტუდენტური სივრცე - „ფიქრის ლაბორატორია“. აღსანიშნავია, რომ ავიაციის ინჟინერიის პროგრამისათვის განკუთვნილი სადემონსტრაციო ნიმუში - „მერკურის“ ტიპის თვითმფრინავი განთავსდა I კორპუსის სკვერში. საგანმანათლებლო პროგრამების სილაბუსებთან შესაბამისობით, სხვადასხვა სასწავლო კურსებში განახლდა ძირითადი და დამხმარე ლიტერატურა და სასწავლო მასალები“, - აცხადებს ბორის გითოლენდია.

სტუ-ის ინფორმაციით, ახალ სასწავლო წელს სატრანსპორტო სისტემებისა და მექანიკის ინჟინერიის ფაკულტეტზე, კომპანია „ავტოტექნოს“ ფინანსური მხარდაჭერით, სტუდენტებისთვის სასწავლო გარემოს გაუმჯობესების მიზნით, იქმნება ინოვაციური კონცეფციის „სასწავლო ცენტრი“, რომლის გახსნის ღონისძიება 15 ოქტომბერსაა დაგეგმილი. 2024-2025 სასწავლო წელს, სატრანსპორტო სისტემებისა და მექანიკის ინჟინერიის ფაკულტეტის ადმინისტრაციის სამოქმედო გეგმით, გათვალისწინებულია არაერთი ღონისძიება და აქტივობა, რომელიც კიდევ უფრო მეტად გააუმჯობესებს სასწავლო გარემოსა და საუნივერსიტეტო ცხოვრებას როგორც სტუდენტებისთვის, ასევე, პროფესორ-მასწავლებლებისათვის.