თბილისში მსოფლიო ტურიზმის დღის ღონისძიების გამართვას საქართველოს წარმატებად ღონისძიების მონაწილე, იამაიკის ტურიზმის მინისტრი ედმუნდ ბარტლეტი აფასებს.

ედმუნდ ბარტლეტის თქმით, დღეს საქართველო აკეთებს განაცხადს მსოფლიოსთვის, რომ ჩვენ მშვიდობის მხარეს ვართ.

„აღფრთოვანებული ვარ იამაიკასა და საქართველოს შორის არსებული თანხვედრით. საქართველომ გაგვაოცა 7 მილიონი ვიზიტორის მასპინძლობით, რაზეც ვეჭვიანობ კიდეც, რადგან ჩვენი რიცხვი 4.3 მილიონია. საქართველოში მსოფლიო ტურიზმის დღე აღინიშნა, რომლის თემაც ტურიზმი და მშვიდობა იყო. მრავალი თვალსაზრისით, ტურიზმი მშვიდობის მთავარი მამოძრავებელი ძალაა მთელ მსოფლიოში, იმ მარტივი მიზეზის გამო, რომ ტურიზმი აკავშირებს ადამიანებს.

დღეს საქართველო აკეთებს განაცხადს მსოფლიოსთვის, რომ ჩვენ მშვიდობის მხარეს ვართ“, - განაცხადა ედმუნდ ბარტლეტმა.

ტურიზმის ეროვნული ადმინისტრაციის ინფორმაციით, გაეროს ტურიზმის ორგანიზაციის ეგიდით საქართველომ მსოფლიო ტურიზმის დღეს პირველად უმასპინძლა.

მათივე ცნობით, მსოფლიო ტურიზმის დღის ფარგლებში საქართველოს ეწვივნენ მსოფლიოს მრავალი ქვეყნიდან მაღალი რანგის სტუმრები, ტურიზმის მინისტრები, დეპარტამენტების ხელმძღვანელები და ტურიზმის სფეროს პროფესიონალები, ჯამურად 300-ზე მეტი დელეგატი.