ბათუმში გოგოლის ქუჩაზე სოციალურად დაუცველები საპროტესტო აქციას მართავენ.

მათი განცხადებით, აღნიშნულ ტერიტორიაზე არსებულ ახალაშენებულ კორპუსში ფართის დაკავება სურთ.

„უსახლკარო მოქალაქეები ვართ, ეს შენობა თურქ ბიზნესმენმა გალიფ ოზთურქმა ააშენა. თქვენც ხედავთ უფუნქციოა და არავინ ცხოვრობს. ზამთარი მოდის და ღია ცის ქვეშ ვართ. ვითხოვთ, აღნიშნულ კორპუსში ბინებით დაკმაყოფილებას”, - განაცხადეს აქციის მონაწილეებმა.

აქციის მონაწილეებს ბათუმის მერიისა და მთავრობის წარმომადგენლები ხვდებიან.

მთავრობის წარმომადგენლებმა აქციის მონაწილეებს განუცხადეს, რომ თითოეული მოქალაქის მდგომარეობის ინდივიდუალური შესწავლა მოხდება.

„რომელ კრიტერიუმს აკმაყოფილებთ, შესწავლა უნდა მოხდეს: იაფი სახლის, სოციალურად დაუცველთა, უსახლკაროთა თუ სხვა, კრიტერიუმს უნდა აკმაყოფილებდეთ. გადავხედოთ თქვენს წარმომადგენლებთან ერთად აღნიშნულ კრიტერიუმებს, ველოდებით სიას და შესაბამისად ვიმსჯელებთ”, - მიმართეს აქციის მონაწილეებს მთავრობის წარმომადგენლებმა.