ლიეტუვის საპარლამენტო არჩევნებში "სოციალ-დემოკრატები" ლიდერობენ

წინასწარი შედეგების თანახმად, ლიეტუვის საპარლამენტო არჩევნებში „სოციალ-დემოკრატიული პარტია“ ლიდერობს, - ინფორმაციას ადგილობრივი მედია ავრცელებს.

მათივე ინფორმაციით, საარჩევნო უბნების 91 პროცენტში ბიულეტენების დამუშავების შედეგების მიხედვით, „სოციალ-დემოკრატიულმა პარტიამ“ არჩევნებში ხმების 20.7 პროცენტი მოიპოვა, მეორე ადგილზეა მოქმედი პრემიერ-მინისტრის, იგრიდა შიმონიტეს კონსერვატიული „სამშობლოს კავშირი“, ამომრჩეველთა ხმების 16 პროცენტზე მეტით, მესამეზე კი, ხმების 15.9 პროცენტით, პოპულისტური პარტია “ნემუნო აუშრა”, რომელსაც რემიგიუს ზემაიტაიტი ხელმძღვანელობს.

ამასთან, მეოთხე ადგილს იკავებს დემოკრატთა კავშირი „ლიეტუვისთვის“, რომელმაც ამომრჩევლების ხმების დაახლოებით 9.3 პროცენტი მიიღო, მეხუთეზე - ლიეტუვის „გლეხთა და მწვანეთა კავშირი“ ხმების დაახლოებით 7.3 პროცენტით. 5 პროცენტიანი ბარიერი ასევე გადალახა „ლიბერალთა მოძრაობამ“, რომელმაც არჩევნებში ხმების 7.2 პროცენტზე მეტი დააგროვა.

ლიეტუვის სეიმის არჩევნებში კენჭისყრაში მონაწილეობა მიიღო ამომრჩეველთა 52.06 პროცენტმა.

შეგახსენებთ, გუშინ ლიეტუვაში საპარლამენტო არჩევნების პირველი ტური გაიმართა, რომელშიც ამომრჩეველი, პროპორციული წარმომადგენლობის საფუძველზე, სეიმის 70 წევრს ირჩევს. მათ შეუერთდებიან ერთმანდატიანი ოლქებიდან ის კანდიდატები, რომლებიც ხმების 50%-ზე მეტს მოიპოვებენ. მეორე ტური 27 ოქტომბერს გაიმართება, როდესაც ერთმანდატიანი ოლქების უმრავლესობაში ამომრჩევლები არჩევანს ორ ყველაზე კარგი შედეგის მქონე კანდიდატს შორის გააკეთებენ. საპარლამენტო მანდატებისთვის 14 პარტია და ერთი კოალიცია იბრძვის.