რაც შეეხება ზოგადად ეკლესიის წარმომადგენლების, სასულიერო პირების დამოკიდებულებას პოლიტიკურ საკითხებთან მიმართებით, ის, რომ მათ აქვთ კონკრეტული დამოკიდებულება, ეს თქვენ არც უნდა გაგიკვირდეთ და არც უნდა გეწყინოთ, - ასე უპასუხა პრემიერ-მინისტრმა ირაკლი კობახიძემ ჟურნალისტის შემდეგ კითხვას: „სასულიერო პირები ხელისუფლების მისამართით დღეს იყვნენ ნეიტრალურები. რატომ არ გაკეთდა მათი მხრიდან ხელისუფლების მხარდამჭერი განცხადებები? ამით არის, თუ არა იმედგაცრუებული?“

კითხვის საპასუხოდ კობახიძემ აღნიშნა, რომ დღეს არის სვეტიცხოვლობა და ყველამ უნდა ისაუბროს ამ დღეს ჩვენი ქვეყნის მთლიანობაზე, რაშიც იგულისხმება, როგორც ფიზიკური, ასევე სულიერი მთლიანობა და გამთლიანება.

„ეს არის ჩვენი მთავარი ეროვნული ამოცანა. რაც შეეხება სახელმწიფოს და ეკლესიას, ბუნებრივია, სახელმწიფო და ეკლესია ერთმანეთისგან არის გამიჯნული. რა თქმა უნდა, ჩვენ პატივს ვცემთ სეკულარიზმის პრინციპს, რომელიც არის ასახული კონსტიტუციაში და ურთიერთობები სახელმწიფოსა და ეკლესიას, ხელისუფლებასა და ეკლესიას შორის ეფუძნება სწორედ ამ პრინციპს. რაც შეეხება ზოგადად ეკლესიის წარმომადგენლების, სასულიერო პირების დამოკიდებულებას პოლიტიკურ საკითხებთან მიმართებით, ის, რომ მათ აქვთ კონკრეტული დამოკიდებულება, ეს თქვენ არც უნდა გაგიკვირდეთ და არც უნდა გეწყინოთ... მე მგონი, თქვენ ხაზი გაუსვით იმას, რომ მთელი ამ პერიოდის განმავლობაში ტენდენცია იკვეთება და კიდევ ერთხელ გავიმეორებ, რომ არც უნდა გეწყინოთ და არც უნდა გაბრაზდეთ ამის გამო“, - განაცხადა ირაკლი კობახიძემ ჟურნალისტის კითხვის საპასუხოდ.