საფრანგეთი ღიაა უკრაინის ნატო-ში მოწვევის იდეისადმი, ეს საკითხი პარტნიორებთან განიხილება, - ამის შესახებ საფრანგეთის საგარეო საქმეთა მინისტრმა, ჟან-ნოელ ბარომ კიევში უკრაინელ კოლეგა, ანდრეი სიბიგასთან გამართულ პრესკონფერენციაზე განაცხადა.

„რაც შეეხება ნატო-ში გაწევრიანებისთვის მოწვევას, [საფრანგეთის] რესპუბლიკის პრეზიდენტმა ამაზე გასულ კვირას პრეზიდენტ ზელენსკის პარიზში ვიზიტის დროს ისაუბრა. ღია ვართ ამისთვის, და ეს არის საკითხი, რომელსაც დღეს ჩვენს ნატო-ელ პარტნიორებთან განვიხილავთ და, რა თქმა უნდა, ამ საუბარში ჩვენი უკრაინელი პარტნიორები მონაწილეობენ”, - განაცხადა ბარომ.

მან აღნიშნა, რომ საფრანგეთი მხარს უჭერს და გააგრძელებს უკრაინის მხარდაჭერას „ფინანსურ, ჰუმანიტარულ, სამოქალაქო ასპექტებში, სამხედრო და ევროპულ კონტექსტებში”.

„ყოველ ეტაპზე ვცდილობდით უკრაინისთვის მთელი საჭირო დახმარება გადაგვეცა იმისთვის, რათა აგრესორისთვის წინააღმდეგობის გაწევა შესძლებოდა და მომზადებულიყო მომენტისთვის, როდესაც მიღებული იქნება გადაწყვეტილება სამშვიდობო მოლაპარაკებების დასაწყებად იმ პირობებში, რომლებსაც უკრაინა განსაზღვრავს”, - განაცხადა მინისტრმა.