„ენერგო-პრო ჯორჯია“ 26 ოქტომბერს საგანგებო რეჟიმში იმუშავებს
საქართველოს საპარლამენტო არჩევნების დღეს „ენერგო-პრო ჯორჯიას“ ტექნიკური სამსახური საგანგებო რეჟიმში იმუშავებს. ყველა მუნიციპალიტეტში 24 საათის განმავლობაში იმუშავებენ საგანგებოდ დანიშნული მორიგე ჯგუფები. ასევე მობილიზებული იქნება ტექნიკაც, - ამის შესახებ ინფორმაციას „ენერგო-პრო ჯორჯია“ ავრცელებს.
მათი ცნობით, კომპანიის მორიგე, პასუხისმგებელი პირების სია უკვე გადაეგზავნა ცენტრალურ საარჩევნო კამპანიას. ცესკოს წარმომადგენელს პირდაპირი კონტაქტი ექნება კომპანიის მთავარ დისპეტჩერთანაც.
„ენერგო-პრო ჯორჯიას“ დირექტორთა საბჭოს თავმჯდომარის გრიგოლ მამისეიშვილის თქმით, კომპანია თავისი კომპეტენციის ფარგლებში ყველანაირად შეეცდება, რომ საარჩევნო პროცესმა ენერგომომარაგების მხრივ უმტკივნეულოდ ჩაიაროს, თუმცა, მისივე თქმით, მნიშვნელოვანია, რომ შენობებში, სადაც საარჩევნო უბნები იქნება განთავსებული, ელექტროენერგიის შიდა ქსელი იყოს მოწესრიგებული, გამხოლოებული და ადგილებზე იმყოფებოდნენ ელექტროგაყვანილობაზე პასუხისმგებელი პირებიც.
„კომპანია მაქსიმალურად უზრუნველყოფს საარჩევნო უბნების ელექტროენერგიით მომარაგებას, თუმცა, უამინდობის, ან სხვა გაუთვალისწინებელი ავარიის შემთხვევაში, ელექტროენერგიის მიწოდება თუ შეუწყდება საარჩევნო უბანს, ვერიფიკაციის და ხმის მთვლელი აპარატები, დენის წყაროს გარეშე შეუფერხებელ მუშაობას რამდენიმე საათის განმავლობაში შეძლებენ, შესაბამისად საარჩევნო პროცესი არ შეფერხდება. მიუხედავად ამისა, კომპანია მზადაა სწრაფი და დროული რეაგირებისათვის“- განაცხადა სს ,,ენერგო-პრო ჯორჯიას“ დირექტორთა საბჭოს თავმჯდომარემ, გრიგოლ მამისეიშვილმა.
„ენერგო-პრო ჯორჯიამ“ აღნიშნულ საკითხებზე თანამშრომლობა ცესკოსთან ჯერ კიდევ 2023 წლის მაისში დაიწყო. მას შემდეგ, კომისიის თავმჯდომარესთან და კომისიის წევრებთან რამდენიმე საქმიანი შეხვედრა შედგა, სადაც დეტალურად განიხილეს საქართველოს საპარლამენტო არჩევნების დღეს საარჩევნო უბნების სტაბილური ენერგომომარაგების საკითხები.
