თსუ-ის ბიბლიოთეკების ერთიანი საძიებო პროგრამა იქმნება
თბილისის სახელმწიფო უნივერსიტეტის ინფორმაციით, თსუ-ს ვებგვერდზე შეიქმნება თსუ-ს ბიბლიოთეკების კატალოგების ერთიანი, საერთო საძიებელი.
თბილისის სახელმწიფო უნივერსიტეტის ცნობით, თბილისის სახელმწიფო უნივერსიტეტში გაერთიანებული თსუ ბიბლიოთეკის, ეროვნული სამეცნიერო ბიბლიოთეკისა და იოსებ გრიშაშვილის სახელობის ბიბლიოთეკა-მუზეუმში არსებული წიგნადი ფონდი ერთ-ერთი ყველაზე დიდია საქართველოში.
„თსუ-ს რექტორის, ჯაბა სამუშიას ინიციატივით, თსუ-ს ვებგვერდზე შეიქმნება თსუ ბიბლიოთეკების კატალოგების ერთიანი, საერთო საძიებელი. ერთიანი საძიებო პროგრამა მომხმარებლებს შესაძლებლობას მისცემს მარტივად ისარგებლონ როგორც თსუ-ის, ასევე საერთაშორისო სამეცნიერო ელექტრონული ბაზებით.
ერთიანი ფანჯრის პრინციპით, მკითხველი მოიძიებს საჭირო დოკუმენტს სხვადასხვა საძიებო პარამეტრებით: დოკუმენტის სახელწოდება, ავტორი, ბარკოდი, საკვანძო სიტყვა და ა.შ.
აღნიშნული გადაწყვეტილება თანამედროვე სამეცნიერო და საგანმანათლებლო საჭიროებებიდან გამომდინარეობს, რაც მნიშვნელოვნად გააუმჯობესებს საბიბლიოთეკო მომსახურების ხარისხს. ერთიანი რესურსები მეტად ხელმისაწვდომი გახდება, როგორც სტუდენტებისთვის, ისე მკვლევრებისთვის.
ახალი სერვისები და საბიბლიოთეკო რესურსების გაზიარება სტუდენტებსა და მკვლევრებს საშუალებას მისცემს უკეთესად გამოიყენონ არსებული შესაძლებლობები, რაც ხელს შეუწყობს მათ პროფესიულ განვითარებას“,- აღნიშნულია ინფორმაციაში.
