ირანმა ისრაელის შეტევას არ უნდა უპასუხოს, - ასე გამოეხმაურა დიდი ბრიტანეთის პრემიერ-მინისტრი, კირ სტარმერი ისრაელის მიერ ირანში მდებარე სამხედრო ობიექტებზე განხორციელებულ საჰაერო იერიშებს.

„ისრაელს უფლება აქვს ირანის აგრესიისგან თავი დაიცვას. ასევე, ჩვენ შემდგომი რეგიონული ესკალაცია თავიდან უნდა ავიცილოთ და ყველა მხარეს თავშეკავებისკენ მოვუწოდებ. ირანმა არ უნდა უპასუხოს“, - განაცხადა კირ სტარმერმა.

მისივე თქმით, დიდი ბრიტანეთი რეგიონში სიტუაციის დეესკალაციის მიზნით მოკავშირეებთან ერთად მუშაობას აგრძელებს.

შეგახსენებთ, ისრაელმა დღეს დილით ირანში სამხედრო ობიექტები დაბომბა. ისრაელის თავდაცვის ძალების ცნობით, თვითმფრინავებმა ირანის საჰაერო თავდაცვის ბატარეებისა და ბალისტიკური რაკეტების საწარმოო ობიექტებს დაარტყეს, რომელიც ირანმა 14 აპრილსა და 1-ელ ოქტომბერს ისრაელის წინააღმდეგ განხორციელებული თავდასხმებისას გამოიყენა.