ენტონი ბლინკენი უკრაინის პრეზიდენტის ადმინისტრაციის ხელმძღვანელს შეხვდა, - ამის შესახებ ინფორმაციას აშშ-ის სახელმწიფო დეპარტამენტის პრესსპიკერი, მეთიუ მილერი ავრცელებს.

მეთიუ მილერის ცნობით, ენტონი ბლინკენმა და ანდრეი ერმაკმა სამხედრო, ეკონომიკური და უკრაინის მხარდასაჭერად მიმდინარე დიპლომატიური ძალისხმევის საკითხები განიხილეს, მათ შორის უკრაინის „მშვიდობის ფორმულის“ მხარდამჭერი კონფერენციები.

„მდივანმა კიდევ ერთხელ დაადასტურა რუსეთის სასტიკი აგრესიის წინააღმდეგ ბრძოლაში უკრაინის სუვერენიტეტის მიმართ აშშ-ის მხარდაჭერა და გაერო-ს წესდებაზე დაფუძნებული სამართლიანი და ხანგრძლივი მშვიდობის მხარდაჭერა“, - აღნიშნულია მეთიუ მილერის განცხადებაში.

ვაშინგტონში ვიზიტით მყოფი ანდრეი ერმაკი ეროვნული უსაფრთხოების საკითხებში აშშ-ის პრეზიდენტის მრჩეველს, ჯეიკ სალივანსაც შეხვდა.

„ჩვენ უკრაინის გამარჯვების გეგმა, მშვიდობის ფორმულის განხორციელება, ფრონტის ხაზი, შეიარაღება და ჩრდილოეთ კორეელი ჯარისკაცები განვიხილეთ, რომლებსაც რუსეთი ომისთვის ამზადებს“, - წერს ანდრეი ერმაკი სოციალურ ქსელში.