დიმიტრი პესკოვის განცხადებით, უკრაინასა და რუსეთს შორის ენერგეტიკულ ობიექტებზე დარტყმების შეჩერების შესახებ მოლაპარაკებებთან დაკავშირებით გავრცელებული ცნობები სიცრუეა.

სიცრუის გამოქვეყნებას ავტორიტეტული გამოცემებიც არ ერიდებიან, - ასე გამოეხმაურა რუსეთის პრეზიდენტის პრესსპიკერი, დიმიტრი პესკოვი გამოცემა Financial Times-ში გამოქვეყნებულ სტატიას, რომლის მიხედვითაც უკრაინა და რუსეთი ენერგეტიკულ ობიექტებზე დარტყმების შეჩერების შესახებ მოლაპარაკებებს აწარმოებენ.

„ბევრი სიცრუეა, რომელსაც რეალობასთან კავშირი არ აქვს. ყველაზე ავტორიტეტული გამოცემებიც არ ერიდებიან იმ ფაქტს, რომ ასეთი გამოგონილი ამბები არსებობს და ისინი ამას უშვებენ“, - განაცხადა დიმიტრი პესკოვმა.

მანამდე, გამოცემა Financial Times-მა, აღნიშნულ საკითხთან დაახლოებულ პირებზე დაყრდნობით, ინფორმაცია გაავრცელა, რომ უკრაინა და რუსეთი ენერგეტიკულ ობიექტებზე დარტყმების შეჩერების შესახებ მოლაპარაკებების საწყის ეტაპზე არიან.

FT-ის ცნობით, მხარეები აგვისტოში შეთანხმების მიღწევასთან ახლოს იყვნენ, როდესაც მოლაპარაკებები კატარის შუამავლობით მიმდინარეობდა. გამოცემა წერს, რომ მოლაპარაკებები მას შემდეგ ჩაიშალა, რაც უკრაინული ძალები კურსკის ოლქში შევიდნენ.