ცესკოს თავმჯდომარის მოადგილე გიორგი შარაბიძე - ყველა კითხვას პასუხი უნდა გაეცეს და თუ ვინმეს ამ ინსტიტუციაში ჩადენილი აქვს რაიმე დანაშაული, ჩემიდან დაწყებული, მზად ვარ, ვაგო პასუხი
როგორც აღმოვაჩინეთ, ძალიან ადვილია განცხადებები აკეთო და რაღაც დააბრალო კონკრეტულ პირებს თუ ინსტიტუციას, სისხლის სამართლის დანაშაული დააბრალო და შემდეგ ამაზე არც საბუთი, არც ფაქტი და არც არანაირი დასაბუთება არ მოაყოლო, - ამის შესახებ ცესკოს თავმჯდომარის მოადგილემ, გიორგი შარაბიძემ ბრიფინგზე განაცხადა.
მისი თქმით, საარჩევნო პროცესი ბრალდებების ასპარეზად გადაიქცა, ამიტომ მზად არის აგოს პასუხი, თუ ცესკოს მხრიდან დანაშაულის ჩადენა დადასტურდება.
„მაღალი საჯარო ინტერესიდან გამომიდინარე გვგონია, რომ ყველა კითხვას პასუხი უნდა გაეცეს და თუ აქ ვინმეს, ამ ინსტიტუციაში ჩადენილი აქვს რაიმე დანაშაული, ჩემიდან დაწყებული, მზად ვარ, ვაგო პასუხი.
მე დიდი ინტერესით დაველოდები და მაქვს მაღალი მოლოდინი, რომ ყველა ის პირი, რომელიც აცხადებს, რომ აქვთ გაყალბების ფაქტები, ამ ფაქტებს შესაბამის ინსტიტუციაში წარადგენენ, ობიექტური და ჭეშმარიტი გამოძიებისთვის, იმისთვის, რომ საბოლოო ჯამში ყველამ შესაბამისი ინფორმაცია მიიღოს.
საარჩევნო პროცესი ბრალდების ასპარეზად გადაიქცა, თითქოს გამოცხადებულია შეჯიბრია, ვინ უფრო მეტ რაღაც სიახლეს წარმოაჩენს“,- განაცხადა გიორგი შარაბიძემ.
