საქართველოს ტურიზმის ეროვნული ადმინისტრაცია დიდ ბრიტანეთში, მსოფლიოში ერთ-ერთ უდიდეს ტურისტულ გამოფენაში კერძო სექტორთან ერთად მონაწილეობს. WTM London 2024-ზე 21 ქართული ტურისტული კომპანია და სასტუმროა წარდგენილი.

ამის შესახებ ინფორმაციას ტურიზმის ეროვნული ადმინისტრაცია ავრცელებს.

გამოფენაში საქართველოს მონაწილეობას ტურისტული კომპანია Visit Georgia-ს წარმომადგენელი ანა მაცაბერიძე აფასებს.

WTM London 2024-ზე, საქართველოს სტენდთან, დამთვალიერებლებს საშუალება აქვთ გაეცნონ ქვეყნის ტურისტულ მიმართულებასა და ტურისტულ პროდუქტებს.

„ჩვენ ვმონაწილეობთ ძალიან ბევრ გამოფენაზე, მათ შორის, WTM-ზეც, რომელიც ლონდონში იმართება. ეს გამოფენა გვაძლევს ძალიან დიდ პერსპექტივას არა მარტო ჩვენს კომპანიას, არამედ მთლიანად ქვეყანას, რომ მსოფლიოს ყველა კუთხის წარმომადგენელმა გაგვიცნოს და გაიცნოს საქართველოს ტურისტული მიმართულება“,- განაცხადა ანა მაცაბერიძემ.

WTM London 2024-ზე, 180-ზე მეტი ქვეყნიდან დაახლოებით 4 ათასი ტურისტული კომპანია და ორგანიზაციაა წარდგენილი, გამოფენის ვიზიტორთა რაოდენობა 40 ათასია.