ლადო ტატიშვილი უნდა გადადგეს და აჭარის მაუწყებელი ხალხს დავუბრუნოთ, - ამ შეძახილებით სტუდენტები საზოგადოებრივი მაუწყებლის აჭარის ტელევიზიისა და რადიოს შენობასთან მივიდნენ და არხზე დახურული გადაცემების გამო პროტესტი გამოთქვეს.

მათი თქმით, გადაცემები, რომლებშიც საპროტესტო აქციები შუქდებოდა, გაურკვეველი მიზეზით დახურეს. აქციის მონაწილეები ტელევიზიასთან რჩებიან და განმარტებებს ელოდებიან.

„ბათუმში ძლიერი სტუდენტური მოძრაობა დაიწყო, რომელმაც გამოაფხიზლა მთელი სტუდენტობა, მაგრამ ახლა ვრცელდება ინფორმაცია, რომ აჭარის ტელევიზიამ გაურკვეველი მიზეზით შეწყვიტა გადაცემები, რომლებიც ჩვენს საპროტესტო აქციებს აშუქებდა. ახლა კეთილი ინებონ და ჩამოვიდნენ და ახსნან, რატომ კლავენ მუხტის გაშუქების რეჟიმს. ჩვენ გვაქვს ლეგიტიმური უფლება მოვითხოვოთ პასუხი. მოვუწოდებთ ღირსეულ თანამშრომლებს, რომ გაიფიცონ და გამოვიდნენ ევროპის მოედანზე“, - აცხადებენ აქციის მონაწილეები.