აშშ-ის პრეზიდენტმა, ჯო ბაიდენმა 39 ადამიანი შეიწყალა, რომლებიც არაძალადობრივი დანაშაულისთვის არიან მსჯავრდებულები და სასჯელი შეუმსუბუქდება 1 500 მსჯავრდებულს, რომლებიც გრძელვადიან სასჯელს იხდიან, - ინფორმაციას Reuters-ი ავრცელებს.

გამოცემა წერს, რომ აშშ-ის პრეზიდენტმა ეს ნაბიჯი მას შემდეგ გადადგა, რაც ხელი მოაწერა საკუთარი შვილის, ჰანტერ ბაიდენის უპირობო შეწყალებას.

„როგორც პრეზიდენტს, მაქვს დიდი პრივილეგია, გამოვხატო წყალობა იმ ადამიანების მიმართ, რომლებმაც გამოავლინეს სინანული და რეაბილიტაცია, დავუბრუნო ამერიკელებს შესაძლებლობა, მონაწილეობა მიიღონ ყოველდღიურ ცხოვრებაში და წვლილი შეიტანონ თავიანთ თემებში და გადავდგა ნაბიჯები სასჯელის უთანასწორობის აღმოსაფხვრელად არაძალადობრივი დანაშაულებისთვის მსჯავრდებულებისთვის“, - განაცხადა ბაიდენმა.

პრეზიდენტის თქმით, ის უფრო მეტ ნაბიჯს გადადგამს მომდევნო კვირებში და რომ მისი ადმინისტრაცია გააგრძელებს შეწყალების შუამდგომლობის განხილვას.

თეთრმა სახლმა განაცხადა, რომ პრეზიდენტს ერთ დღეში შეწყალების ამდენი აქტი არასდროს გამოუცია.