იმისთვის ვდგავართ აქ, რომ ჩვენთან სასამართლო არ არსებობს, ჩვენ, ყველა ვართ მარტო და ეს მარტო ადამიანები გავერთიანდით იმისთვის, რომ ჩვენი ქვეყანა გვიცავდეს,- ამის შესახებ მსახიობმა ანა ტყებუჩავამ “ინტერპრესნიუსს” პარლამენტთან მიმდინარე აქციაზე განუცხადა, რომელსაც “ჩცდ მარშთან” ერთად შეუერთდა.

მისი თქმით, მარშის მონაწილეები უერთდებიან ყველა იმ მოთხოვნას, რაც ქვეყნის ევროპულ მომავალს და თავისუფალ საქართველოს სჭირდება.

„დღეს „ჩცდ მარში“ გვქონდა. ისედაც აქ ვდგავართ ხან ერთად, ხან ცალ-ცალკე. სერიალში ისეთ თემებს ვეხებით, ჩვენი გმირები ისეთ უსამართლობას აჟღერებენ, რომ უფლება არ გვქონდა, დღეს ასე, ოფიციალურად არ დაგვეჭირა მხარი და სოლიდარობა არ გამოგვეცხადებინა რეჟიმის პატიმრებისთვის. ჩვენც, რა თქმა უნდა, ვუერთდებით ყველა იმ მოთხოვნას, რაც ჩვენს ქვეყანას, ევროპულ მომავალს და თავისუფალ საქართველოს სჭირდება.

სამწუხაროდ, არ ვიცი, რა იქნება ამ პროცესების გაგრძელება. არ მაქვს უფლება, რომ ისინი გავამხნევო…

ჩვენ ხომ ამისთვის ვდგავართ აქ, რომ ჩვენთან სასამართლო არ არსებობს. ჩვენ, ყველა ვართ მარტო, ცალკე და ჩვენ ეს მარტო ადამიანები გავერთიანდით, რათა ჩვენი ქვეყანა გვიცავდეს. ასეთი ქვეყანა გვინდა”,- განაცხადა ანა ტყებუჩავამ.