აშშ-ის არჩეული პრეზიდენტის, დონალდ ტრამპის განცხადებით, პრეზიდენტობის პირველივე დღეს ხელს მოაწერს აღმასრულებელ ბრძანებებს და გამოიყენებს თავის საპრეზიდენტო უფლებამოსილებებს მასობრივი დეპორტაციის ოპერაციების დასაწყებად, გარემოსდაცვითი რეგულაციების შესამცირებლად და მრავალფეროვნების პროგრამების დასასრულებლად, - ინფორმაციას BBC-ი ავრცელებს.

„ბაიდენის ადმინისტრაციის ყოველი რადიკალური და სულელური აღმასრულებელი ბრძანება გაუქმდება რამდენიმე საათში მას შემდეგ, როცა ფიცს დავდებ. ჩვენ პირველ რიგში ამერიკას ვაყენებთ და ეს ყველაფერი ხვალ იწყება. ხვალ ძალიან გაერთობით ტელევიზორის ყურებისას“, - განაცხადა ტრამპმა ინაუგურაციის წინა დღეს მხარდამჭერებთან შეხვედრაზე.

BBC-ი წერს, რომ დონალდ ტრამპი, ორშაბათს, სავარაუდოდ, ხელს მოაწერს 200-ზე მეტ აღმასრულებელ მოქმედებას, ეს მოიცავს აღმასრულებელ ბრძანებებს, რომლებიც იურიდიულად სავალდებულოა, და პრეზიდენტის სხვა დირექტივებს, როგორიცაა პროკლამაციები, რომლებიც, ჩვეულებრივ, იურიდიულად სავალდებულო არ არის.