პარლამენტთან აქცია განახლდა. რუსთაველის გამზირზე საავტომობილო მოძრაობა გადაკეტილია.

პარლამენტის წინ მიმდინარე აქციას თბილისის სხვადასხვა ლოკაციიდან რამდენიმე მარში შეუერთდა.

აქციის მონაწილეებმა პარლამენტის მიმდებარე ტერიტორია უწყვეტი პროტესტის 58-ე დღესაც უცვლელი მოთხოვნით დაიკავეს - დაინიშნოს ახალი არჩევნები და გათავისუფლდნენ აქციების პერიოდში დაკავებული პირები.

აქცია მშვიდობიან რეჟიმში მიმდინარეობს. დემონსტრანტებს ადგილზე მოტანილი აქვთ სხვადასხვა შინაარსის ბანერები.

ცნობისთვის, მოქალაქეების პროტესტი ირაკლი კობახიძის 28 ნოემბრის განცხადებას მოჰყვა, რომლის მიხედვითაც საქართველომ ევროკავშირთან გაწევრიანებაზე მოლაპარაკებების გახსნა 2028 წლამდე გადადო.