საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, პროფესორმა დავით ნარმანიამ სხვადასხვა უნივერსიტეტის სტუდენტებისთვის სემეკის საქმიანობის სპეციფიკისა და რეგულირების საკითხების შესახებ საჯარო ლექცია წაიკითხა. ამის შესახებ ინფორმაციას საქართველოს ენერგეტიკისა და წყალმომარაგების მარეგულირებელი ეროვნული კომისია ავრცელებს.

მათი ცნობით, სემეკის თავმჯდომარემ, დავით ნარმანიამ დეტალურად ისაუბრა ელექტროენერგიის, ბუნებრივი გაზისა და წყალმომარაგების სექტორების რეგულირების მნიშვნელობაზე, მელიორაციის სექტორის განვითარებაზე, სატარიფო პოლიტიკასა და განახლებადი ენერგიების ხელშეწყობაზე. სემეკის თავმჯდომარემ ყურადღება დამოუკიდებელი მარეგულირებელი კომისიის ფუნქციებსა და საერთაშორისო პროექტებზე გაამახვილა, ასევე ისაუბრა ენერგეტიკის სექტორში კონკურენციის აუცილებლობაზე და სტუდენტების კითხვებს უპასუხა.

„მისასალმებელია სტუდენტების ინტერესი ენერგეტიკისა და წყალმომარაგების საკითხებზე. ენერგეტიკის სექტორში მიმდინარე რეფორმა და ამ კუთხით არსებული გამოწვევები, დიდ დაინტერესებას იწვევს სხვადასხვა პროფესიის ახალგაზრდებში. ყოველთვის გამოვთქვამთ მზადყოფნას, შევხვდეთ სტუდენტებს, სკოლის მოსწავლეებსა თუ სხვადასხვა პროფესიის წარმომადგენლებს, ვუპასუხოთ მათ კითხვებს და მივაწოდოთ ინფორმაცია რეგულირებად სექტორებში მიმდინარე აქტუალურ საკითხებზე“, - განაცხადა დავით ნარმანიამ.

მათივე ინფორმაციით, საჯარო ლექციის დასრულების შემდეგ, სტუდენტებმა სემეკში დამონტაჟებული მიკროსიმძლავრის ელექტროსადგური დაათვალიერეს და მისი მუშაობის სპეციფიკას გაეცნენ.