სასამართლოში აქციებზე დაკავებული დავით ლომიძისა და თემურ ზასოხაშვილის პროცესი მიმდინარეობს
თბილისის საქალაქო სასამართლოში პოლიციელზე თავდასხმის ბრალდებით დაკავებულების, დავით ლომიძისა და თემურ ზასოხაშვილის სასამართლო პროცესი მიმდინარეობს.
სხდომას ესწრება მხოლოდ თემურ ზასოხაშვილი. რაც შეეხება დავით ლომიძეს, ის პროცესში დისტანციურად იღებს მონაწილეობას. როგორც ლომიძის ადვოკატმა დიმიტრი ვარდიაშვილმა სხდომის დაწყებამდე განაცხადა, ბრალდებულმა კლინიკა „ვივამედში“ ოპერაცია გაიკეთა, ახლა კი ის მე-18 სამკურნალო დაწესებულებაშია გადაყვანილი, რის გამოც პროცესზე ვერ გამოცხადდა.
დღევანდელ სასამართლო პროცესზე მხარეები შესავალ სიტყვას წარმოთქვამენ.
ცნობისთვის, დავით ლომიძე და თემურ ზასოხაშვილი 2024 წლის 1-ელ დეკემბერს დააკავეს. პროკურატურის ინფორმაციით, ისინი ღამის საათებში, თბილისში, პარლამენტთან მიმდინარე საპროტესტო აქციის დროს, ჭიჭინაძის ქუჩაზე თავს დაესხნენ განსაკუთრებულ დავალებათა დეპარტამენტის თანამშრომლებს და მათ ე.წ. „მოლოტოვის კოქტეილები“ ესროლეს. ასევე, აღნიშნული ქმედების შედეგად ცეცხლი წაეკიდა შინაგან საქმეთა სამინისტროს ბალანსზე არსებულ წყლის ჭავლის სპეციალურ ავტომანქანას.
მათ ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა პოლიციელის სამსახურებრივ საქმიანობასთან დაკავშირებით) წარედგინათ, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.
v-if="article.gallery" v-html="article.gallery"
