ეკონომიკისა და მდგრადი განვითარების სამინისტროსთან შეკრებილი აქციის მონაწილეები მსვლელობით საქართველოს პარლამენტისკენ მიემართებიან, სადაც 81-ე დღეა უწყვეტი საპროტესტო აქცია მიმდინარეობს.

სამინისტროსთან შეკრებილებმა ბათუმში, ე.წ. ოცნების ქალაქში უბედური შემთხვევის შედეგად დაღუპული ორი ბავშვის ახლობლებსა და მთელს საქართველოს სამძიმარი გამოუცხადეს.

გარდა ამისა, მანიფესტანტებმა „ქვეყანაში არსებულ მძიმე ეკონომიკურ მდგომარეობაც ისაუბრეს“.

ცნობისთვის, გუშინ ბათუმში, უბედურ შემთხვევას ორი მცირეწლოვანი ემსხვერპლა. არსებული ინფორმაციით, ბავშვები ერთ-ერთი გასახლებული მოქალაქის მიერ გაკეთებულ საკანალიზაციო თხრილში ჩავარდნენ, რომელიც წყლით იყო სავსე. საქართველოს შინაგან საქმეთა სამინისტრომ ფაქტზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.