საქართველოში, მომხმარებელთა უფლებების დაცვის ეფექტიანობის გაუმჯობესების და საერთაშორისო თანამშრომლობის გაძლიერების მიზნით, საქართველოს კონკურენციისა და მომხმარებლის დაცვის სააგენტოსა(GCCA) და პოლონეთის კონკურენციისა და მომხმარებლის დაცვის ოფისს (UOKiK) შორის თანამშრომლობა დაიწყო.

ამის შესახებ ინფორმაციას კონკურენციისა და მომხმარებლის დაცვის სააგენტო ავრცელებს.

მათივე ცნობით, მომხმარებლის დაცვისა და აღსრულების საერთაშორისო ქსელის (ICPEN) მენტორობის პროგრამის ფარგლებში, 2025 წლის 20 თებერვალს, GCCA-ის მომხმარებლის უფლებების დაცვის დეპარტამენტის და UOKiK-ის წარმომადგენლების ერთობლივი მონაწილეობით, ონლაინ ფორმატში, პირველი სამუშაო შეხვედრა გაიმართა.

„ტრენინგი, ძირითადად, შეეხებოდა საქმის შესწავლის პროცესში მტკიცებულებების შეგროვების ინსტრუმენტებს. აღნიშნულმა სწავლებამ მნიშვნელოვნად უნდა შეუწყოს ხელი GCCA-ის თანამშრომელთა კვალიფიკაციის ამაღლებას, რაც, თავის მხრივ, უზრუნველყოფს კანონდარღვევების უფრო ეფექტიან გამოვლენასა და მომხმარებლის უფლებების დაცვის კანონმდებლობის ხარისხიან აღსრულებას.

მიმდინარე წლის განმავლობაში, თანამშრომლობის ფარგლებში, დაგეგმილია GCCA-ის თანამშრომლებისთვის სპეციალიზებული ტრენინგებისა და სემინარების ჩატარება, „ქეისების“ განხილვის პროცესში პოლონელი ექსპერტების კონსულტაციების მიღება, სასწავლო ვიზიტების ორგანიზება და სხვა ერთობლივი აქტივობები“, - აღნიშნულია ინფორმაციაში.