საქართველოს ჭადრაკის ფედერაციის ინფორმაციით, რუმინეთის ეფორი-ნორდში 15 მარტიდან სტარტს ევროპის ვაჟთა ინდივიდუალური პირველობა აიღებს, რომელშიც 40 ქვეყნის 377 მოჭადრაკე იასპარეზებს.

მათივე ცნობით, კონტინენტის ჩემპიონატი ვაჟ მოჭადრაკეთა შორის, ყველაზე პრესტიჟული ტურნირია ევროპულ ჭადრაკში და მასში უძლიერესი მოჭადრაკეები მონაწილეობენ.

ტურნირი შვეიცარიული სისტემით, 11 ტურად ჩატარდება და I-XXII ადგილზე გასული მონაწილეები მსოფლიო თასის საგზურს მოიპოვებენ.

„ევროპის ჩემპიონატი თითოეული მოჭადრაკისთვის დიდ გამოწვევას წარმოადგენს, რადგან აქ არა მხოლოდ საპრიზო ადგილებისთვის, არამედ მსოფლიო თასის საგზურებისთვისაც იბრძვიან. ჩვენი მოჭადრაკეები ხშირად გვასახელებენ საერთაშორისო ასპარეზზე და იმედია ამჯერადაც ღირსეულად იასპარეზებენ",- განაცხადა საქართველოს ჭადრაკის ფედერაციის პრეზიდენტმა, აკაკი იაშვილმა.

ფედერაციის ინფორმაციით, საქართველოს ღირსებას ტურნირზე ბაადურ ჯობავა, ლევან ფანცულაია, გიგა ყუფარაძე, თორნიკე სანიკიძე, ლუკა პაიჭაძე და ნოე თუთისანი დაიცავენ.

„თამაშები თბილისის დროით 18:00 საათზე დაიწყება.

პირველი ტური – 15 მარტი

დასვენების დღე – 21 მარტი

დასკვნითი, მე-11 ტური – 26 მარტი.

ევროპის ჩემპიონატზე საქართველოს ვაჟთა ნაკრების მხარდამჭერი საქართველოს სპორტის სამინისტროა“,- ნათქვამია ინფორმაციაში.