„ნაციონალურ მოძრაობაში“ აცხადებენ, რომ ლევან ვარშალომიძემ ყაზახეთში იზოლატორი დატოვა
აჭარის მთავრობის ყოფილმა თავმჯდომარემ, "ნაციონალური მოძრაობის" წევრმა, ლევან ვარშალომიძემ ყაზახეთში იზოლატორი დატოვა. ამის შესახებ ინფორმაციას „ნაციონალურ მოძრაობაში“ ადასტურებენ.
როგორც „ინტერპრესნიუსს“ პარტიის ერთ-ერთმა წევრმა, ლევან ანთაძემ განუცხადა, იურიდიული პროცედურები ჯერ არ დასრულებულა და ლევან ვარშალომიძე ჯერჯერობით კვლავ ყაზახეთში რჩება.
ინფორმაციისთვის, ყაზახეთში ლევან ვარშალომიძის დაკავების თაობაზე ინფორმაცია 18 მარტს გავრცელდა. „ნაციონალური მოძრაობის“ ცნობით, ის მაშინ დააკავეს, როდესაც აეროპორტით საზღვარს კვეთდა.
როგორც პარტიაში აცხადებდნენ, წინასწარი ინფორმაციით, საქმე ეხება რუსეთის ფედერაციიდან გაგზავნილ ინფორმაციას სისხლის სამართლის საქმესთან დაკავშირებით, რომელიც უკრაინის ხელისუფლებასთან ლევან ვარშალომიძის პოლიტიკურ საკონსულტაციო საქმიანობას უკავშირდება.
