ვადასტურებ, რომ 28 მარტს საგარეო საქმეთა სამინისტრომ დიპლომატიური არხებით ამერიკული მხარისგან მიიღო ე.წ. მინერალური რესურსების შესახებ შეთანხმების ახალი ტექსტი, - ამის შესახებ უკრაინის საგარეო საქმეთა მინისტრმა, ანდრეი სიბიგამ განაცხადა.

მისი თქმით, უკრაინას აქვს საკუთარი კანონმდებლობა ამ ტიპის დოკუმენტის შემუშავებისთვის და საჭირო შიდა პროცედურები უკვე დაწყებულია.

მან ასევე დაადასტურა, რომ უკრაინამ ამერიკულ მხარესთან შეთანხმების ტექსტზე კონსულტაციები დაიწყო და პირველი რაუნდი უკვე გაიმართა.

ანდრეი სიბიგას მტკიცებით, უკრაინული მხარე მზად არის ხელი მოაწეროს დოკუმენტს, რომელიც დააკმაყოფილებს როგორც შეერთებული შტატების, ასევე უკრაინის ეროვნულ ინტერესებს.

„მიგვაჩნია, რომ შეთანხმების ტექსტი, უნდა ითვალისწინებდეს ძლიერი, მსხვილი ამერიკული ბიზნესის გაძლიერებულ ყოფნას, ასევე წვლილს უკრაინის უსაფრთხოების ინფრასტრუქტურაში. ყოველთვის მნიშვნელოვანია უკრაინაში ამერიკული ბიზნესის ყოფნის გაძლიერება. ამიტომ, ეს პროცესი გაგრძელდება და ჩვენ ამერიკელ კოლეგებთან ერთად ვიმუშავებთ ხელმოწერისთვის ორმხრივად მისაღები ტექსტის მისაღწევად”, - აღნიშნა სიბიგამ.